Berben xarma

Baina bidegabekeriak darrai...

2012-03-06T22:25:00.014+01:00

Galdakao eta inguruetako oroimen historikoa berreskuratu eta ezagutzera emateko sortutako koordinakundea da 'Galdako Gogora' taldea.

Bada, aurten dute lanaldi gogorrena herrian, 75 urte direlako Euskal Herriko hainbat eta hainbat herri bonbardatu zutenetik. Galdakao horietariko bat izan zen eta horrexegatik, herritar jator eta euskaldunez osatutako talde honek hilabeteetako egitarau oparoa osatu du herri mailan.

Lehenengoetariko saioak, emakumeen nazioarteko egunaren harira ospatuko diren ekintzekin egin du bat. Hala, Galdakaoko Udaleko 'Berdintasun Arloak' eta 'Galdako Gogora' taldeak elkarlanean, Torrezabal Kultur Etxeko berotasunean Izarren argia filmaren Zine Forumaz gozatzeko aukera eman dit koordinakundearen gonbidapenak.

1938. urtean, Espainiako Gerra Zibileko alderdi ilunetariko bat bizi izan zuten geure arbasoek Kantauri Itsasoari begira zegoen Saturrarango emakumeen presondegian, eta gertatutakoak islatu nahi izan ditu Mikel Rueda zuzendariak film eder honekin.

Neure txoko honetatik pelikula triste, gogor, hunkigarri baina egiazko hau ikusteko gonbitea baino ezin dizuet egin. Aretoak gainezka egin duen jardunaldi bakarrenetarikoan, amorrua eta hunkidura nagusi zela esatera ausartuko nintzateke. Eta neu ere hala sentitu naiz, amorruz beteta.

Egindakoagatik oraindik barkamenik eskatu ez duten garai "baketsu" eta biolentzia gaitzestu "behar" den honetan, agerian uzten du lan honek jakin badakiguna:

Nekez justifikatuko dugu gerra bat, ezin izango dugu ultra-eskuindarren itxurakeria ere sinistu (alderdi demokratikoen siglen atzean ezkutatuta ere), egundo ez dugu Guardia Zibilaren iragana eta jatorria ahaztuko, eta horregatik, ezingo dugu euren presentzia Euskal Herrian onartu... eta, oraindik hamaika jarraitzaile dituen eliza katolikoaren betekizunarekin ere, ez dugu inoiz bat egingo.

Neure oinarriak berretsi ditu Izarren argia ("Estrellas que alcanzar", gaztelaniaz) lanak, beste behin, emakumeen garrantzia nabarmenduz baina bizitako zapalkuntza azpimarratuz. Horrelako filmegatik ez balitz, aspaldi ahaztuta izango genuke geure herriaren iragana.

Horregatik, zorionak eta neure eskerrik beroena guzti hau posible egin duzuenoi, geure iraganaren pasartetxo bat gogorarazteagatik, ba erakundeen esku balego... geure iragana ahantzita, ezin izango baikenuke geure Herria eraikitzen jarraitu...

Bertsozaleontzako gutizia

2012-02-13T16:23:00.003+01:00

Ikustea merezi duen saio horietarikoa eskaini digu azken 'Hitzetik Hortzera'-k.

Nabarmentzekoak, Iturenen Julio Soto eta Andoni Egañaren arteko barrez lehertzeko bertsoaldia, Amets Arzallusek baloi batekin "tokeak" ematen dituen bitartean Egañak Zeanurin botatakoak eta lehenbiziko aldiz eskaini den esperimentua, Bideoa Bertso Bide izenburupeko saioa Bilboko Alhondigan.

Azken honetan izan ginen gu eta aurpegi batzuk ezagun egingo zaizkizue, beraz! =)

Bideoa, hementxe ikusgai.

Tomen nota

2012-02-08T16:22:00.003+01:00

"Aunque nosotros seamos de fuera, el euskera es la cultura de nuestra hija"

Estella-Lizarra
C. Solano

Christian Wendler, de 31 años, e Isabel Suárez, de 34, viven en Estella-Lizarra pero proceden de Düsseldorf (Alemania) y Vilanova de Arousa (Galicia). Van a matricular a su pequeña Ainhara para el ciclo de Infantil en Lizarra Ikastola, centro al que la niña acude desde que tenía 5 meses. Tras la experiencia vivida en la escuela infantil, no hay duda. Lizarra Ikastola es su colegio por su proyecto educativo y su enseñanza del euskera.

Siendo ustedes de Alemania y de Galicia, ¿por qué decidieron escolarizar a su hija en un centro con el euskera como base?

Precisamente por el idioma. Aunque nosotros no somos de Estella, la niña nació aquí y el euskera es una parte de sus raíces, de su cultura y de su tradición y consideramos que debía aprenderlo desde pequeña. También queríamos defender y apoyar este idioma. No concebimos la educación de nuestra hija sin el euskera.

¿Y por qué Lizarra Ikastola?

Es nuestra primera opción. Tenemos excelentes referencias de este centro y su proyecto educativo nos encantó. Así que decidimos traerla desde los cinco meses y ahora que hay que escolarizarla en Infantil, no tenemos ninguna duda. El trato con las andereños ha sido excelente durante estos primeros años y queremos que nuestra pequeña continúe aquí. La comunicación entre el centro y los padres es excelente, hay una total implicación de las familias. Creemos que es una enseñanza muy personalizada y sabemos que nuestra hija está bien en Lizarra Ikastola.

El hecho de que se oferte toda la enseñanza obligatoria, ¿también influyó?

Por supuesto. Aquí nuestra pequeña entró con cinco meses y saldrá con 16 años y a lo largo de todo ese periodo tendrá siempre cerca personas conocidas en un ambiente familiar.

Su hija será plurilingüe...

Efectivamente. Hablará castellano, euskera, gallego, alemán e inglés. De hecho, en casa hora se habla castellano, gallego y alemán y se canta en euskera con Pirritx eta Porrotx.

Si algún día tienen que mudarse a sus lugares de origen, ¿prevén que su hija continúe aprendiendo euskera?

Por supuesto, trataremos de que si algún día nos vamos, que no es nuestra intención, ella conserve su idioma por todos los medios.

2012-02-03
noticiasdenavarra.com-etik jasoa

Bitxikeritxo bat

2012-02-02T15:06:00.004+01:00

'LaSexta' albistegiko aurkezleak Gasteizko denboralearen berri eman nahi zuen eta telebista-kate honetako protokoloak bikain agintzen duen legez, arratsaldeon! batekin agurtu du Arabako hiriburuan zegoen erreportaria. Azken honek aldiz, ondo ahoskatutako "buenas tardes" batekin erantzun du platoko kazetaria.

Itxura eskasa. Tristea. Baina benetakoa.

Etxekoak ditugu agur, egunon edota eskerrik asko bat esateko inongo ahaleginik egiten ez dutenak. "Adiós" edo "muchas gracias" batekin ez dute besterik behar eta...

Ganoraz

2012-01-30T16:35:00.006+01:00

Geure inguruan ohikoak diren akatsak zuzendu edota norberak izan ditzazkeen zalantzak argitzeko, Ganoraz aholku linguistikoen atala sortu dut neure blog pertsonalean.

Euskaraz ganoraz idatzi eta ganoraz hitz egin dezagun.

Tokian tokiko euskalkian eta bakoitzak aukeratutako moduan idatzi daitekeelako, baita modu formal zein informalean, 'Twitter', 'Tuenti', 'Facebook' edota korreo elektronikoz idazten duguna ere, egoki idatzi daitekeelako. Aldiz, sare sozialetan hizkuntzari garrantziarik ez ematetik sortzen dira geure idazkeran hain ohikoak diren hanka-sartzeak (oinarrizkoak asko).

Horregatik, euskarak zuretzat garrantzia badu, tarteka argitaratuko ditudan aholkuei begiradatxoa egiteko gonbitea luzatu nahi dizut.

Euskaraz ere, GANORAZ egin daitekeelako!

Bertsolarien burmuinaren ikerketa

2012-01-27T11:40:00.004+01:00

...eta hain leku konplexutik, zerbait argia ateratzea espero al dute? Ikerketa interesgarria...

Beti mirestu izan ditut bertsolariak eta, beti uste izan dut gogor entrenatzea baino zerbait gehiago dagoena euren baitan, ez dakit, baina HANDIAK dira.

Zientziak azaldu nahi du bertsolarien gaitasun mentala 'Berria'

Investigan en bertsolaris cómo funciona el lenguaje en el cerebro 'Gara'

Bertsolaris de laboratorio 'Deia'

¿Qué pasa en el cerebro del bertsolari? 'El Correo'

Euskarazetamol

2012-01-25T00:32:00.005+01:00

Merezi omen duen futbol norgehiagoka horietarikoa izan dugu gaur.
Espainiako Errege Kopako final-laurdenetan izan da Athletic, Mallorca talde balearraren aurka, buruz buru. Geureek irabazi eta eskuratu dute, bigarren urtez segidan, finalaurrekoetarako pasea. Bejondeizuela!

Idaztera bultzatu nauenak, aldiz, ez du kirolarekin zer ikusirik. Edo bai! =)

Geure gizartean modu neurrigabean inposatzen ari den kultura bati (inposatu, geuk nahi dugulako, noski), geure hizkuntza eta kulturarentzako erabat probetxugarriagoa den alternatiba umoretsua aurkitu diot Bilbon: ‘Euskarazetamol’ antzezlana.

Patxo Telleria eta Mikel Martinez aktoreek Ez dok hiru Bikoteatroa osatzen dute eta gaur ikusi dugun saioa ‘Dibertimenduak’ izenez bataiatu zuten trilogiaren azken ekoizpena da.
Euskarazko emanaldi honek, geure hizkuntza gai nagusi hartuta, euskaraz eta euskararen kontura trufa egiten du; "supereuskalduna" izateko formularen bila, mintzairarekin jolastuz entretenitzen duen bitartean.

Izugarria eta, denaren gainetik, azpimarratzekoa iruditu zait lanaren gidoia.
Dagoeneko maila on bat eskuratu duten euskarako ikasleentzat gomendagarria da emanaldia. Baina hortik, aitzina. Gidoi bizkorra da, arina eta oso adimentsua. Ez du pentsatzeko denbora askorik eskaintzen, txiste baten atzetik beste bat etorriko delako jarraian, eta horren ostetik erritmo aldaketa nabarmen bat…
Ordubeteko saioan ez dago ordularia begiratzerik, ez dago aspertuko den ikuslerik. Loak, ez du orain tokirik, ikusleak ere azkarra izan behar duelako emanaldiak eskatzen duen mailan egoteko.

Aulki bi, alfonbra bat, zakarrontzidun esekileku bakarra eta beren-beregi antzezlan honetarako diseinatutako traje batzuetatik ateratzen dituzten osagarriak dute atrezzo bakarra. Ez dago beste ezerezekin nahasterik. Euskara eta umorea, huts-hutsik.

Aktoreek ere, zer esanik ez, ez dute zalantzarako tarterik uzten eta izugarri gustatu zaizkit erritmo eta tonu aldaketak edota protagonisten joan-etorriekin, agertoki soil bati atera dioten onura, une oro ikuslearen arreta bereganatuz…

Euskaldun peto-petoa izateko pilulak eskaintzen ditu 'Euskarazetamol'-ek, beraz. Eta erakutsi digu, beste behin, geure hizkuntzarekin badagoela entretenitzerik. Badagoela irri egiterik.
Euskarak denerako balio duelako, eta… pilularekin zein pilularik gabe, nekez suspertuko delako geure bultzadarik jaso ezean.

Zumaia

2012-01-24T17:50:00.003+01:00

Zer da Athletic?

2012-01-19T16:01:00.003+01:00

Batzuentzat "bilbainada" edo handikeri bat izango da agian, besteentzat sentimenduz beteriko kontua. Azken horiei, hortaz, hurrengo testua eskaini nahi diet.

Gaztelaniaz dago eta, futbola gustatu zein ez, ahots leunarekin eta emeki-emeki dena jarraian irakurtzeko moduko idatzia da. Ez Athletic-en inguruan hitz egiten duelako (baita ere), baizik eta irakurtzea merezi duen testutxo horietarikoa delako, nire ustez. Gozatu berben xarmaz:

"
¿Qué es el Athletic? El Athletic es el aitite y el nieto compartiendo bandera. El bocadillo de ama o la bufanda tejida por amama. La bota del vecino y el abrazo con el desconocido... La lluvia racheada, entrando por Ingenieros. La mujer que de niña soñó con calzar botas y la hija que lo logró. El último domingo compartido con aita, sin saber que sería el último. El primer beso íntimo.... rodeado........................ de 47.000 ojos. El escudo al atardecer, al fondo de una calle de bares. El puro fumado por uno, pero compartido por todos. El grito desesperado, la emoción desbordada, la lágrima suelta. Y el placer de los placeres. El éxtasis. El rugido del león. El ¡A por ellos! y el Beste bat! o el ¡Athleeeeeeeeeeeetic! Con bufandas al viento. Los primeros cortos y rotundos. El tercero, arrastrado, con sentimiento, dejándote el alma: feliz. Así es nuestro Club, de todos y de nadie, singular en filosofía y plural en seguidores. Tan respetado como incomprendido. Hay equipos que hacen historia, en el Athletic queremos hacer leyenda. Y todo porque, un día, en un acuerdo no escrito, quisimos seguir nuestro camino. Donde otros veían el final, nosotros veíamos principios. Elegimos ser David, cuando todos querían ser Goliat. A la utopía con la épica pasando por Bilbao. En eso estábamos, y estamos. Un acuerdo que se mantiene, pese a todo, entre millones de aficionados alejados en lo geográfico, lo político, lo cultural y lo social. Aquel día, elegimos: "vencer menos, para ganar más". Y entendimos que el Athletic es una cuestión de familia. Lo del fútbol, créeme, es secundario.
"

Paradoxa bat

2012-01-16T15:42:00.000+01:00

Egun gazi-gozoa gaurkoa.

Manuel Fraga, Francisco Franco diktadore-inperialista-totalitarioaren taldeko ministro eta zerbitzari izan zena eta, hortaz, faxisten sarraskian zuzenean parte hartu zuen Partido Popular alderdiko sortzailea hil egin da.

Hori izango litzateke alde gozoa, ez balitz bere heriotza bidegabeagatik izango.

Heriotza bidegabea diot, bere ohean hil delako, goxo-goxo eta egindakoagatik inork epaitu gabe. Biolentzia gaitzestea modan eta derrigorrezkoa den honetan, Fraga barkamenik eskatu gabe joan da.

Hori gutxi balitz, laudorio eta berba ederrak baino ez dira jaso komunikabide gehienetan, bere iragan sarraskitzailea kontuan hartu gabe, bere heriotzak pertsona on bihurtuko balu bezala.

Baina bere 60 urteko politikagintza faxista legez laburbiltzea txarto dago, aldiz, Txillardegiren ibilbide luze eta aberatsa ETAko sortzaile lanetan laburbiltzea, ondo dago... Paradoxa bitxia.

Agur eta inoiz arte, Fraga!

Txillardegi hil da

2012-01-15T15:44:00.000+01:00

Eskerrik asko emandako guztiagatik. Agur eta ohore, Txillardegi Handia.

Gogoratzen?

2012-01-11T16:50:00.003+01:00

Aspaldiko kontu batekin topo egin dut sarean.

Bilboko Areatzan, EiTBren babesarekin aurkeztu genuen munduko errusiar xerrarik handienaren gorabeherak biltzen dituen BIDEOA!!!
Ahotsik bakoa baina laburra eta polita da. Ederki laburbiltzen du jardunaldi hartan islatutakoa.

Eskerrik asko, David eta taldekide guztiei!

Bueltan...

2012-01-08T22:05:00.005+01:00

Gabon garaia pasatu dugu eta horrekin batera hasiera eman diogu urte berriari, aldez aurretik... urte berri on!

Urte berriarekin bizitza berririk ez, baina bai proiektutxo batzuk bistara.
Horien artean, iazko berberak: 'Olentzeroren Etorrera 2011' eta 'Erregeen Kabalgata 2012'.

Lehenengoaren berri blogaren bitartez eman banuen ere, 'Erregeen Kabalgata 2012' saio berezia urteko bosgarren egunean aurkeztu genuen Izaro Iraetak eta biok, zuzenean, ETB-1 eta eitb.com-en bitartez. Honaxe saioa iragartzen zuen albistea.

Saioak osorik ikusteko aukera ere badago, noski, 'EiTB Nahieran' plataforma medio.

Horretarako, koloreztatutako ondorengo hitzetan klikatzea besterik ez dago:

Erregeen Kabalgata 2012
Olentzeroren Etorrera 2011

Argazkia: ETB

Politikariek, krisirik bai?

2011-12-20T23:51:00.003+01:00

Espainiako presidente ohia den R. Zapaterok erretiroa hartu du, 51 urte dituela eta hilarteko soldata bermatua. Adibide bikaina espainiar estatuko biztanle guztientzat, besteak beste, erretiroa 67 urterekin hartu behar izatea inposatu duen agintariak eman duena.

Goi-mailako politikariak herritar xumeak bezalakoak direna esaten digutenean… zer sinistu behar dugu geuk?

Datorren legealdirako Espainiako presidente izendatu dute Mariano Raxoi politikari galiziarra eta, agintean hasi baino lehen, amaigabeak izan ziren jakinarazi zituen egiteke dituen aldaketak. Krisia aitzakiatzat hartuta, egin beharreko aldaketa edo lege berri horiek ikasle eta langileei zuzenduta daude. Ez aldiz, politikariei zuzenduak.

Italian oraintsu egin duten tankeran, zergatik ez dituzte geure politikari salbatzaileek euren soldatak jaitsi eta biziarteko neurri bako soldata aberatsak deuseztatzen?

Politikari maiteok, izan zaitezte herritarron eredu, zuen sinesgarritasun tamalgarria hutsaren hurrenera kondenatzen baitzaudete…

Olentzero eta Erregeak, ETB-1en!

2011-12-19T15:55:00.001+01:00

Aurten ere "Olentzeroren Etorrera 2011" eta "Erregeen Kabalgata 2012" aurkezteko ohorea izango dut bigarren urtez!

Olentzero ostiral honetan, hilaren 23an, iritsiko da Bilbora eta egun berean eskainiko dugu bere etorrera, arratsaldeko 19:00etatik aurrera ETB-1en!

Aurtengoan aldiz, krisi garaietara egokituko diren aldaketa batzuk izango ditugu ostiraleko saioan eta Maite Eskarmendik eta neuk emango dizuegu jaialdiaren berri baina jendartean murgildurik, 'set' edo platorik gabe.

Iazko argazki hau ez dugu Olentzerorekin errepikatuko, beraz.
Bai aldiz, "Erregeen Kabalgatan". Urte berriko bosgarren egunean, iazko saioarekin aldaketa handirik izan gabe, bertan izango gaituzue Izaro Iraeta eta bioi, zuzen-zuzenean ETBko lehenengo katean!

Gabon hauetan beraz, utzidazue zeuen etxeko berotasunera sartzen! =)

Zer egin funtzionarioekin?

2011-12-15T17:33:00.010+01:00

Bart gauean, CEOEko* presidente den Juan Rosell irakurri eta entzuteko aukera izan nuen hainbat hedabidetan, besteak beste, krisia aitzakia hartuta funtzionarioen inguruan solasean.

Rosell jaunak sektore publikoan enpresa pribatuan bezala kaleratu ahal izateko neurriak hartzeko eskatu zuen. Gainera, administratzaile publikoei ardura pertsonalak exijitzeko aukera izatea ere eskatu zuen Rosellek, gastuaren kontrola bermatze aldera. Bere hitzetan, funtzionarioen parte batek ez baitu bere eginkizunarekin betetzen edo, beste barik, ez duelako inongo lan ezta betebeharrik ere. Horregatik dago, hain justu, sektore publikoa neurriz kanpo.
Kaleratzeak azken aukera beharko lukeela onartuz, eskainitako prentsaurrekoan arlo publiko eta pribatuaren artean desberdintasun gutxiago egotera ohitu behar garena baieztatu zuen atzo CEOEko presidenteak.

Beste hainbat daturen artean, esanguratsuak iruditu zitzaizkidan eman zituen ehunekoak:
2002 eta 2009 urteen artean, soldatek %5,9 egin zuten gora sektore publikoan, pribatuan %2,8 bakarrik igo zirelarik.

Ekonomiaren inguruko neure oinarrizko ezagutza azpimarratuta eta patronalaz hitz egiten ari garena ahantzi gabe, datuak datu, gaurkoan arrazoi eman behar diot Juan Rosell CEOEko presidente jaunari. Honaxe azaleko hausnarketa pertsonala.

Titular bat eman eta gogor hastearren, hauxe esango nuke: Funtzionarioak desagertu beharko luke. Ez luke desagertu beharko funtzionarioak egiten duen lana. Inondik inora ere. Baina bai langilearen baldintzak. Harira:

Galbahe funtzioa izan dezan, bat nator oposizioak gainditu behar izatearekin, baina ez dut uste azterketa gainditzeak biziarteko lanpostu eta soldata bati lotuta egon behar duenik.

Horrek, behinik behin, lan egiteko grinak estali, norberaren burua eroso kokatu eta buruari gero eta gutxiago exijitzeko arriskua dakar. Eta, utzidazue ausardiaz esaten, asko direla egoera horretan jauzi diren funtzionario bizizaleak. Labur esanda: zertarako saiatu, lanpostutik inork kaleratuko ez badu eta herritar guztien diruarekin hilabete guztietan poltsikoa bete eta primeran biziko bada? Ez du merezi!

Sektore publikoan, lansari publikoarekin dauden langile gehiegi baditugu ere, grinatsuki bakan batzuek egiten dute arretaz lan.

Aldiz, hori ez da dena.
Egiten duten lan-administratiboa beharrezkoa da geure izapideak aurrera eraman ahal izateko eta horrexegatik hain zuzen, gizartearen zerbitzura daudelako, exijituko nieke enpresa pribatu bateko langileei exijitzen zaien neurri berean. Edo gehiago. Denon diruarekin bizi baitira ederki. Alde batera utzita, noski, nominako zenbaki luzeak, lan ordutegiak eta horietariko batzuek postu horretara iristeko baliatu dituzten bide zalantzagarriak… badakizue lagunok, konfiantzazko karguak, ildo politiko bereko kideak, mesedeak, nahierara ezarritako aulkiak…

Horregatik, orokorrean aritu naizela onartuz, oraingo honetan bat nator patronalarekin eta funtzionarioek ere langile profesionalak izan behar dutela bermatu beharra dago. Hala ez izatekotan, kale gorrira.

Bidegabeko pribilejioak alde batera utzi eta gizarte lehiakor baten alde egin dezagun lan, alferrek ez baitute erakunde publikoetan lekurik!

Sen on pixka bat, arren.

* Enpresa Erakundeen Konfederazio Espainiarra

Biharamunaren ostean...

2011-12-07T15:54:00.003+01:00

Hementxe duzue aurreko ostiralean ospatutako euskararen aldeko Pilota Jaialdiko saio osoa ikusgai, ETB-1ek Donostiako Atano III.etik zuzenean eskainia.

Eskas entzuten bada ere, 08:40. minututik aurrera duzue neuk egindako aurkezpena eta jarraian Abel Barriolak irakurritako manifestua.
Pilotalekuak gainezka egin zuen eta giroa ederra bezain beroa izan zen. Primeran pasatu genuen eta horren adibide duzue tarteka pantailan agertzen garen galdakoztarrak! =)

Norgehiagoken emaitzak bigarren plano batera pasata, euskararen aldeko aldarria izan genuen presente eta Euskararen Eguna egunero dugula gogoratuz, eskerrik asko Atano III.era bertaratutako euskaltzale guztiei!

Euskararen jatorria: enigma europar bat

2011-12-03T15:23:00.002+01:00

“Zuhaitza ikur eta erro baldin bada euskaldunarentzat, hizkuntza da arima.

Esana geratu da: euskara dakiena da, euskaldun.

Hizkuntza da nortasuna dakarrena. Eta bere jatorri eta ahaide ziurrak ez ezagutzeak, ezinegona ez, baina jakin nahia eragiten du, besterik ez bada.

Hizkuntza zurtza da oraingoz; euskara, Europaren bihotzean.

Segiko du, ordea, erakartzen zientzialarien jakin nahia. Bere jatorriaren inguruko teoria berriak piztuko ditu geroan ere. Ahaidetasun ia ezinezkoak denon ahotan dira ibiliko, eta mende luzeetako bere biziraupenaz gaitu harrituko.

Izan ere, jatorriaren misterioak, biziraupenaren harrigarriak, garaietara egokitzeko erakutsi duen gaitasunak eta indartuz, inoiz edo behin hizkuntza normalizatua izateko hartua daukan erabakiak, bakan-bakana egiten dute euskara.

Zalantza gabe, benetako enigma europarra.”

Hasier Etxeberria, ETB-1
Euskararen jatorria: enigma europar bat

Euskararen Nazioarteko Eguna ere, ETBn!

2011-11-30T22:53:00.006+01:00

Gaur, asteazkena 30, 22:45etik aurrera, Hasier Etxeberriaren 'Euskararen jatorria: enigma europar bat' dokumentala emango du ETB-1ek.

Horrela, Euskararen Nazioarteko Eguna ospatzeko Euskal Telebistak programazio berezia eskainiko du gaurko dokumentalaren estreinaldiarekin hasita.

Gainera, ondorengo saio bereziak ere eskainiko ditu ETBko lehenengo kateak:

Biharko Anitzele saioak keinu egingo dio larunbateko egunari Bernardo Atxaga idazlea gonbidatu hartuta. Larunbatean bertan, Mihiluzek bere 900. saioa eskainiko du eta ohikoa dugun legez, geure hizkuntzarekin jolastera gonbidatzeaz ez ezik, pertsonai ezagunak ere izango dira protagonista. Batutako diru guztia "Ez ahaztu Alzheimerraz" lemapeko EiTBko Maratoira bideratuko da. Ondoren, Sautrela literatur saioa igandean hasiko den Durangoko Azokari begira jarriko da. Mahai-inguru formatuan, sei idazlek parte hartuko duten edizio berezian.

Ostirala aipatu gabe jarraitu dudala konturatuko zineten. Bada, egun hau izango da neuretzat bereziena. Gauean, ETB Kantxak euskararen aldeko pilota jaialdia emitituko du Donostiako Atano III.a pilotalekutik.

Norgehiagoka nagusian lehen mailako pilotariak izango dira, nor baino nor: Irujo eta Laskurain, Xala eta Barriolaren aurka. Eta bertan izango naiz neu! Bai horixe!

Jaialdia baino lehen hainbat kirolari ospetsuk, euskalgintza eta kulturako pertsonaik, aipatutako pilotariekin batera manifestu bat irakurriko dute bertaratutako eta ETB-1eko ikus-entzule guztien aurrean.

Neuk Jaialdia aurkezteko ohorea izango dut eta 1.856 lagunentzako eserlekuak dituen frontoiak gainezka egingo duela jakiteak... indarrak eman eta berotu egiten nau! Astelehenean gonbidapen guztiak agortu egin ziren eta geure hizkuntzaren aldeko jaiaren arrakasta bermatua dago, lagunok!

Bertaratu ezin zaretenok, gogoratu ostiralean hitzordua duzuela, 22:00etatik aurrera ETB-1eko zuzeneko emanaldiarekin!

Jozank

2011-11-29T16:24:00.001+01:00

Euskara Elkarteen Federazioak, Topaguneak, antolatutako 'Jozank' programa prestatzen...

Bertan, sona handiko musikari eta abeslariak, sofa eta plato inprobisatu batean, neuk egindako elkarrizketaren bidez ez ezik, euren zuzenekoez gozatuz, bideoak ikusiz eta ikusleen galderen bitartez ere ezagutuko ditugu.
Ikusleek galderak egiteko bide desberdinak izango dituzue: Tuenti edota sare sozialetan galdetutakoa pantaila erraldoian ikusiz, bertaratutakoek zuzenean, papertxo bitartez...
Musika mundua eta artistak ezagutzeko aukera paregabea!

Ostiral honetan, abenduak 2, Zallako Antzokitik eskainiko dugu saioa, Iñaki Etxezarraga 'EtxE' kantautorea eta Siroka taldearekin.

Emakumeenganako indarkeriari ez? Beste ikuspuntu bat

2011-11-25T15:43:00.010+01:00

Bai. Ados. Noski emakumeenganako indarkeriaren kontra nagoena. Ez dut uste hori inork zalantzan jarriko duenik.
Baina neure kritika pitin bat harago doa. Hori bai, irakurle, ez ezazu txarrera hartu, asmo onenekin baitoaz neure berbak.
Gaia zorroztea besterik ez dut helburu. Korapilotsea, akaso.

Zoritxarrez, egi borobila da gizarte honetan hedatuenetarikoa dugun gaitz edo "lakra" gorrotagarriaren aurka egiteko, gaur bezalako egunak behar dituguna. Aldarrikatzeko ez. Aurka egiteko ere ez, gaitza eta berau sortzen dituzten basatiak desagerrarazteko eguna izan beharko litzateke gaurkoa! Ezin dugulako albistegietan ia egunero jasotzen ditugun bortxakeri, indarkeri edota hilketen inguruko berri txar gehiago barneratzen jarraitu. Nahikoak barneratu baititugu jadanik. Gehiago ez, ez eta ez.

Hala ere, gaurko eguna ez dut oso gustuko. Euskal Jaia, Aitaren Eguna, Amaren Eguna, Domu Santu edo Hildakoen Eguna,... eta antzekoak bat ere atsegin ez ditudan neurri paretsuan.
Konforme. Guztiz desberdinak dira adibide legez jarri ditudan egunen arrazoiak eta gaurko egunez idaztera bultzatu nauenarenak. Batzuek ospatzeko aitzakia dute, kontsumitzekoa, zurikerietan ibiltzekoa... eta gaurko aldarrikapenak ospatzeko ezertxo ere ez duen arren, egunari ematen zaion konnotazioarekin ez nator bat. Negatibo bilakatzen den diskriminazio positibo batean jausten ari gara.

Zergatik "biolentzia matxista"? Zergatik "emakumeenganako indarkeriari ez"? Alajaina, emakumeak direlako genero-indarkeria gehien pairatzen dutenak, eta horixe nabarmendu beharrean gaude. Zalantza barik.

Neuk, ordea, solasaldi eta komunikabideetan sekula agertzen ez den gutxiengo hori ekarri nahi dut geurera.

Zergatik ez dugu gizonenganako indarkeriaren kontrako eguna antolatzen? edota umeenganako indarkeriaren aurkako eguna aldarrikatzen? Gutxiengoa direlako, ados. Baina ez horregatik garrantzi gutxiagokoak.
Zahartzaroan dauden adineko pertsona askok ere gehiegikeriak sufritzen dituzte egunero... ez al dute gizartearen aintzatespena merezi?

ETA erakunde armatuaren indarkeria soilik eta espresuki gaitzestearen alde ez nagoen bezala... edo ETAk sortutako biktimak bakarrik omentzearen alde ez nagoen modu berean... Neuk ez ditut sexu konkretu bateko biktimak bakarrik defendatu nahi. Sentsibilizazio guztiak kontuan hartu behar ditugulako, gutxiengoak badira ere, inor mindu ez dezagun gai konplexu eta mingarri honetan.
Horregatik, eta emakumeei begirunea galdu gabe, edonon ikus dezakegun lema horri 'emakume' hitza kenduko nioke. Funtsean, eta zoritxarrez, emakumeak aipatutzat joko baititugu gainontzeko denak bereizi gabe.

Hori bai, amaitzeko eta laburbilduz, ez nuke neure hausnarketa hezkuntza eta pertsonen heziera aipatu barik amaitu gura. Argi laga dezagun:

Ez dago errua izango duen minigonarik. 'Probokazio' hitzak ez du orain balio. Ez dago horrelako basakeria justifikatuko duen aitzakiarik.
Inor ez da inorena.
Egun honek indarkeria guztiak kontuan hartu eta gizarte askeago bat eraikitzen lagun diezagula, jardunaldi soil batean oinarrituko ez dugun geure etorkizun oparoa lantzeko.

Jon Gomez Garai
2011ko azaroaren 25ean

Noiz errespetatuko gaituzte?

2011-11-23T15:47:00.003+01:00

Nahiz eta ohituak gaituzten, arrazoirik ez du falta Xabier Euzkitze ETB-ko aurkezleak, bere 'Facebook'-eko kontuaren bitartez adierazi digun lotsaizun honen salaketan:

"Herenegun arratsaldean, SER kateko tertulian, UPNko Javier Markotegik JeroaBai esaten zuen behin eta berriz. Nahita, noski, mespretxuz. Uxue Barkosek errespetua eskatu zion, eta ahoskera zuzena zein den gogoratu, baina berdin jarraitu zuen. Proposamen bat egin nahi dut: aurrerantzean Marcotegüi deitzea jaun txit agurgarri horri. Marcotegüi jauna."

ERRESPETUA, lagunok, E-RRES-PE-TU-A. Nahikoa da!

Javier Markotegi (UPN), Nafarroako Parlamentuan.

Kontxi Belandia (II)

2011-11-21T16:00:00.006+01:00

Agindua emana nizuen eta bete dut.

Irailaren 28an herrian eta inguruan aski ezaguna dugun amama maitagarrienarekin agertzen nintzen argazki bat igo nuen neure Facebook-eko hormara eta ia jardunaldi bakarrean hainbat izan zineten argitaratutakoan iruzkinak egin eta gustoko zenutela adierazi zenuten norbanakoak.

Emozionatu ere egin nintzen hautsitako marka horrekin eta urri hasieran azalpena, argazkia eta iruzkin guztiak bildu eta geure Amama Kontxiri oparituko nizkiola hitz eman nizuen.
Halaxe egin nuen duela gutxi eta bere etxeko atea jota, zeuen laguntzarekin, neure omenaldi xumea egin nion herriko eta inguruko euskaltzale amorratuenari.

Poz-malko batzuk ere jauzi zitzaizkion geure Belandia andratxoari eta gustora aritu ginen ordu luzez. Denontzako esker oneko hitzak baino ez zituen adierazi arratsalde osoan.

ZEURI, ESKERRIK ASKO KONTXI MAITIA!

Basauritik Oionera, euskeraz

2011-11-16T14:30:00.009+01:00

Interesgarria Urko Aristi ETB-ko aurkezle eta kazetariak bere blogean egindako hausnarketa, ETB-1en euskarazko testigantzak jasotzearen harira. Autokritika ona.
Arrazoi duzu, Urko, geuk zaintzen ez badugu, nork zainduko baitu euskara?

"Baina errezkeria, edo erosokeria, euskeraren etsai bihur daiteke"
"...Gureari errespetua badiogu, ekin diezaiogun egunerokoan, ladreilurik gabe, ezin osatuko bait dugu gure etxea"

Hurren arte, Kepa!

2011-11-15T15:36:00.003+01:00

'Elkar adosten dakigunean, atsegina da bizitza
Gure gatazkak bideratzeko arma onena da hitza'

Eta hitz horiekin joan zaigu Kepa Mallea Olaetxea jauna, irakasle, euskaltzale amorratu, abertzale, bakezale eta gizon Handia, atzo Bilboko Santutxu auzoko ezbeharrean burubako basati batek hil zuenean.

Nik ez nuen Kepa ezagutzeko zorterik izan baina ingurukoen hitzak entzun, egunkariak zabaldu eta argitaratutakoa irakurrita... zeharo astinduta gelditu naiz Euskal Herriak berebiziko lagun bat galdu duenaz ohartzean. Ez dago eskubiderik.

Neure doluminik bizienak senide eta ingurukoei.
Eskerrik asko emandako guztiagatik, Kepa. Goian bego.

Greziako arazoaren iruzurra

2011-11-11T16:36:00.007+01:00

Diruaren zarrastelkeriari errepaso ederra!
Greziaren benetako arazoa Daniel Cohn-Benditen eskutik.

Daniel Cohn-Bendit jatorri alemaneko politikari frantsesa da, egun, 1994tik eurodiputatu. European Green Party alderdiko ekologista.

Ikusi beharrekoak ikusita...

2011-11-08T16:45:00.000+01:00

Gero eta argiago daukat "kritikotasuna" eta "kriteriotasuna" eskolan erakutsi beharko liratekeela benetako pertsona konpetenteak hazte aldera, askoren etxean seme-alaba eder, majo eta ikasle fin izatearekin konformatzen direla ikusita...

Hori bai, dena irakasleen esku utzi barik, hezkuntza eta errespetua etxetik ikasita eraman behar dira.

Ba al zenekien?

2011-11-04T15:15:00.007+01:00

Neure inguruko askok sarritan galdetu didate eta zeuek ere galdera hauek maiz egingo zenizkioten zeuen buruei... Bada, honaxe azalpen zabal eta ulerkor bat:

Zer dira audientziak? Nori interesatzen zaizkio?
Zertarako neurtzen dira? Nork neurtzen ditu?

Eta batez ere...
Nola neurtzen dira telebistako audientziak?

Jakin nahi? Egin klik hemen.

Ikusi eta (ez) ikasi!

2011-11-03T15:39:00.006+01:00

Barre egiten badugu ere, gaur egun horrelako hanka-sartzeak pairatu behar izatea tristea iruditzen zait. Nork eta Bilboko Udalak egindako akatsak, gainera...

Ez diot EGAdun eta euskaltzainburu bat egon behar duenik geure Herrian euskaraz egiten den kartel bakoitza egin edota zuzentzeko, baina arren, interes eta errespetu pixka bat, bederen!

Irudia handitzeko, egin klik argazkiaren gainean.
ETB-1eko 'Mihiluze' saiotik hartua.
Lander Iruretagoienaren argazkia.

Euskaraz bizi!

2011-11-02T15:24:00.003+01:00

Euskaraz bizitzea zer den, Kike Amonarrizek bikain azaldua!

Izarren Distira

2011-10-28T19:40:00.001+02:00

BIHAR, 'Izarren Distira' galako Final Handia aurkeztea dagokit.

Hilabete luzeen ondoren eta, eskualdeka hainbat gaztetxo eta nerabe casting-ak egiten ibili ostean, sorpresaz beteriko biharko finalean lehiatuko dira geure inguruko "izarrik onenak". Bakoitzak hoberen egiten dakiena ikusi eta epaimahaikideen balorazioak entzunda, 'Izarren Distira 2011ko' txapeldunak ezagutuko ditugu Durangoko San Agustin Kultur Gunean, arratsaldeko 19:00etatik aurrera.

Geure Herrian etorkizun handia dagoena erakusten duen finala iritsi da...
Animo eta zorterik onena lehiakide guztiei! Bihar arte, lagunok!

Errautsak

2011-10-25T15:43:00.000+02:00

Igor Elortza eta Unai Iturriagak idatzitako 'Errautsak' antzezlanak azken emanaldiak emango ditu urria eta azaroan.

Data horien artean, berebizikoak dira Bilbon eskaini behar dituztenak, hain zuzen ere, Kale Nagusiko BBK aretoan egin behar zituztelako. Ondo esan dut, egin behar zituztelako.

Ikuskizunetako kartelak eta publizitate guztia eginda zegoenean, banku honek azken orduan bertan behera utzi zituen euren egoitzan egin behar zituzten hiru saioak. Nahiago nuke banketxe honek emandako arrazoiak aipatuko ez banitu. Baina entitate maiteak emandako arrazoiak arrazoi, azkenik, 'Errautsak' umorez betetako antzezlan handiaren Bilboko emanaldiak Deustuko 6. Pabiloian eskaini beharko dituzte urriaren 27, 28 eta 29an, iluntzeko 20:00etan!

Antzerkia bizirik dagoela frogatzen duen lan honetaz gozatzeko aukerarik ez galdu!

'Pabellon Nº 6' delakora, nola iritsi?

Betikoaz...

2011-10-24T01:09:00.002+02:00

Ikusteke utziko ditut 'La Sexta' telebista kate espainiarrak asteon Euskal Herriko gatazkaren inguruan egin dituen saio biak: "Borrando a ETA" eta adierazpen sonatuaren ostean grabatutako "Reiniciando Euskadi"...

Ikusi baino lehen: izenburuak ez zaizkit gustatzen, ona baina aurkezlea ez da nire estilokoa eta gertutasuna erakusten duen arren, objektibotasunaren eskasian morboa besterik bilatzen ez dela jakinda... Beldurra ematen didate kanpotik geure arazoa negozio bihurtzera datozen horien pantomimak.

'Urte berri on, Amona!'... Ona!

2011-10-17T00:08:00.006+02:00

Gaur ikusi dut 'Urte berri on, Amona!' euskarazko film berria.

19:30etako emanaldian 16 pertsona egon gara, 400 eserleku baino gehiagoko aretoan... Tira... Galdakaon, lau jardunalditan filmaren sei emanaldi egon direna pentsatu gura dut... Baina hori ez da arrazoi.

Haatik, honekin geldituko naiz:

Amaierak gehiago nahi izateko gogoekin utzi banau ere eta euskara hutsezko film bat erdaraz azpitituluekin ematea gustatzen ez zaidan arren , GUZTIZ GOMENDAGARRIA den pelikula da, bai horixe!
Kalitatezkoa, entretenigarria, umoretsua, intrigaduna eta geurea! Esateko erraza dela dakidan arren, pena da euskarazko produktu gehiago ez izatea merkatuan. Horrelako produktuek asko merezi dute.

Hala ere, honekin lotuta, hasieran aipatutako arrazoi horietara buelta gintezke. Euskarazko produktuak kontsumitzera ohituak ez gauden garai honetan, nola eskatuko dugu normaltasun linguistikoa, euskaradunok ez badugu euskara hutsezko produktuetan dirurik inbertitzen? Nork nahi izango du euskarazko produktu bat sortu, gero salduko ez bada?

Hausnarketarako gai sakona... Badakit, ez da unea, agian.
Hori bai, iruzkin honen funtsera bueltatuz, ikusi 'Urte berri on, Amona!' =)

Beste bat, mesedez!

2011-10-06T20:18:00.009+02:00

Duela hilabete batzuk neure babesle berriarekin harremanetan jarri banintzen ere, gaur izan dut hemendik aurrera arropako babesle izango dudana ezagutzeko aukera: Beste Bat.

Errenterian duten egoitza nagusian izan naiz goiz osoan: biltegi, estudio, administrazio eta denboraldiko bilduma osoa gertutik ezagutzen.

Plazerra izan da pertsona jator, euskaldun eta profesionalak ezagutzea, besteak beste, Aintzane bitartekaria, Ione komertziala eta Iñaki zuzendaria. Kalitate ona zentzu guzti-guztietan, merezi duena. Horregatik, jasotako tratuagatik eta eskainitako denagatik: eskerrik asko!

Eta zeuk, gogoratu, ez zaitez bakarrarekin konformatu: eskatu BESTE BAT! =)

Beste Bat markaren Facebook-eko orrialdean.
Egin klik irudian handiago ikusteko.

Kontxi Belandia (I)

2011-10-04T15:44:00.005+02:00

Galdakaon, nork ez du neure ondoan dagoena ezagutzen?

Erdaraz sekula entzungo ez duzun pertsona, euskaraz mundu guztiari egin eta geure hizkuntzan egitera denei "behartzen" diena... Bera da geure Amama Kontxi!

Bakoitzaren herrian bera bezalako 10 balira... Geure arazo linguistikoa konponduta legoke!

Lehen denboraldiko azken saioa genuen ETB-1eko 'Arratsaldero' saioan eta despedida legez, euskarazko saio guztietako ikus-entzulerik fidelenarekin joan nintzen nire asteroko hitzordura.
Estitxu, Oihan eta 'Arratsalderoko' lankide guztiek ondo baino hobeto ezagutzen zuten Kontxi, baina beti entzunez. Eta horixe duzue irudi honen azalpena: egunero saiora deitzen zuen amamatxoa aurkeztu nahi nion ekipo guztiari.

Arratsalde ederra pasa genuen batetik bestera! Gora Amama Kontxi!

Geure parte-hartzea ikusi, 3:01:00-tik aurrera.

Kazetari maltzur horiek

2011-09-15T17:49:00.003+02:00

Gaur egungo kazetaritza duinaren adibide garbia: MANIPULAZIOA!

'El Mundo' egunkariko "kazetari" eta bere erredakzioko nagusia izan daitekeenaren arteko solasaldia duzu hau. Zinez merezi duena. Egin kontu!

Lotsagabekeria erreal hau irakurtzeko, egin klik hemen.

...eta desagertzen utziko dugu?

2011-09-13T01:00:00.000+02:00

"Eingo al deu?"

2011-09-13T00:52:00.005+02:00

Lagunok, argaldu nahi duzuela eta gimnasioan izen emateko dirurik ez?
Aurreztu nahian zabiltzatela? Baina aldi berean osasuntsu eta itxuroso egon?

Hona hemen aurreztuz, argaltzeko eta gozatzeko biderik egokiena!

"Badakizue, honekin edo harekin, baina egin!" ;-)

"Sexua da argaltzeko modurik dibertigarriena"

Udan denok nahi dugu argaldu, baina gimnasiora joatea zaila egiten da askotan. Horregatik, itxura ona izan nahi badugu eta kiloak galdu nahi baditugu, beste moduren bat bilatu behar da, eta modurik dibertigarriena sexua da zalantzarik gabe.

Sinesteko zaila den arren, 15 minutuko sexu-harreman batean 150 kaloria erretzen ditugu, bikotekidea biluzten 120, eta orgasmo bakoitzarekin 27… baina orgasmoaren itxura egiten bada, 350 kaloria baino gehiago gal daitezke.

Beraz, postura kitzikagarrienen berri emango dizugu, eta gozamenaren gorenera iristeaz gain, kaloriak galduko dituzu postura hauekin. Zer gehiago eska daiteke?

Amazona: Gizonezkoa gora begira etzanda dago, eta emakumea bere gainean esertzen da kukubilka. Gozamenaren gorenera iritsiko zara, eta gainera, ipurmasailak indartuko dituzu.

Fusioa: Gizonezkoa eseri egiten da, eskuak atzean finkatuta dituela, eta emakumea bere gainean esertzen da. Hankak flexionatu, eta eskuak gorputzaren atzean jarri behar dira. Postura honetan, besoak eta aldakak indartzen dira, flexioak egiten direnean bezala.

Menperatua: Gizonezkoa sabaira begira etzaten da, eta emakumezkoa bere gainean esertzen da, bizkarrez, gizonezkoen hanketara begira. Horrela, besoak lurrean jarriz, emakumeak besoak indartzen ditu.

(EiTB-ko "Eingo al deu?" blogetik hartua)

Geure Herria ezagutuz...

2011-09-07T15:58:00.008+02:00

Apirilaren 2rako airean izan genuen IBIL2D saioko 5. atala eta, 5 hilabeteren ondoren, Baztan aldera itzuli gara asteburu pasa; lanaldian egindakoak gogora ekarri, telebistarako elkarrizketatu nituenekin topo egin eta bailarako beste hainbat herri ezagutzera.

Konpainia onean eginez gero, erabat gomendagarria hedaduraz Euskal Herriko haranik zabalena denari bisita egitea! Egonaldi bikaina! ;-)

Almandoz, Amaiur, Aniz, Arizkun, Arraioz, Berroeta, Elizondo, Erratzu, Gartzain, Gorostapolo, Irurita eta Ziga herrietan barrena ibili gara.

Agur Folklore Bizian 2011!

2011-07-27T15:42:00.006+02:00

Urtero legez, aurtengoan ere Galdakaoko Andra Mari Dantza Taldekook nazioarteko Folklore Bizian jaialdia antolatu dugu Bizkaiko hainbat herritan. Amaitu berri dugun 2011ko edizio honetan Mexikoko Zacatecas eta Kalmukia errepublikako Tulpan taldeak izan ditugu geurean.

Geure taldekide guztien laguntza eta borondate onarekin eramaten dugu aurrera jaialdia, geuk kudeatzen ditugu talde guztiak geure artean txandakatuz eta geuk egiten ditugu zerbitzari, garbitzaile, orientatzaile eta, orokorrean, anfitrioi lan guztiak; nola ez, datozen atzerritar guztiek geure berri izan eta ahalik eta hoberen egon daitezen Euskal Herriko egonaldian.

Baina asteatako lan handia bada ere, urtero talde hobeagoak, jatorragoak izateak eta saio guztietan jende gehiago ikusteak indarrak ematen dizkigu lanean jarraitzeko eta geure kulturaren berri ematen dugun moduan, beste kultura batzuk geurera ekartzen jarraitzeko.

Aurtengo taldeei erreparatuz gero, talde bikainak eta arrakasta handikoak izan badira ere, Errusiar Federazioaren hegoaldean dagoen Kalmukia errepublikakoek jaialdiko azken emanaldian, Arrigorriagako kiroldegira bertaratutako danoi eskaini ziguten opari hau erakutsi gura dizuet ondorengo bideoan: Mikel Laboaren "Txoria Txori" kantua, kalmukiar erara.

Jaso zuten txalo zaparrada izan zen euren arrakastaren seinale.

Eskerrik asko eta hurren arte!

Zurdori

2011-07-09T23:45:00.005+02:00

Neure animorik beroena etxeko danei, gaur moduko egun gogorretan hartu ditzazun behar besteko indar guztiak, zeure aitak izandako indar eta espiritu eder guztien lekuko izan zaitezela zeu hemendik aurrera; mundu honetan zeure aitak izan dezakeen testigantza eta lekukorik onena baitzara zeu, June.

Zeure aita, Iñaki Oleaga izan da, bederen, herri honek izan duen gizonik konprometituena.
Herriarentzat bizi izan den galdakoztarrak dena eman die bere herritarrei. Herritik eta herriarentzat lan egin duen elkarte, talde edota norbanako orori laguntzeko beti prest egon den euskalduna. Herriko jaietan hezi batzuk behar genituela? Hortxe zegoen bera, 20 minututan gura besteko heziak zenituen zeuk eskatutako lekuan. Baina horrekin nahikorik ez eta kamioi baten beharrean zeundela? Oleaga deitu eta hurrengo eguneko goizeko 08:00etan deika zenuen bera, kamioia prest zegoela esateko.

Horrek gogora ekarri nahi izan ditudan pasadizo bi baino ez dira izan baina, zenbat elkarteri lagundu eta erraztu dizkio lan eginezin asko? Herria eraikitzeko bidean pieza ezinbestekoa zen “Zurdo”.

Zenbatezinak dira Galdakaon izan dituen merituak baina, Iñaki askoz gehiago zen. Langilea eta hitzeko gizona ez ezik, umoretsu eta adoretsutzat ere genuen bere burua. Bere ekinean, ezina egina bihurtzen zuen euskaltzalea. Tipo apala bezain herritar bikaina.

Horregatik diot herri honek gizon Handia galdu duena. Gizon Handia bere alor guztietan. Gizon aparta.

Jadanik ez dugu udal-brigadako arduraduna bere 4x4 ibilgailu zuriarekin joan-etorrian ikusiko. Ez ditugu bere poteo ezinbestekoak gertutik jarraituko, baina berak egindako lan guztiaz gozatzen jarraituko dugu geuk. Hori baita Oleaga jaunari egin diezaiokegun omenaldirik handiena. Eta bestela, norbaitek aurkitu dezala Galdakaon bere inguruan txarto esaka zebilen norbait! Bere langileetatik hasi eta herriko edozein ezagunetan amaituta, mundu guztiak izan ditu bere inguruko berba ederrak. Baina ez gaur, ez atzo: beti.

Bera izan da iluntasuneko argi izpi. Eta izaten jarraituko duenez, gogoratuko dugu beti.

Denak zeu lakoak balira, “Zurdo”, herri honek beste zentzu bat izango luke seguru!

Denon berotasunarekin, zeure alabak jarraituko du zeuk egindako bidea.

Eskerrik asko eta hurren arte Iñaki.

Hara!

2011-07-08T18:15:00.006+02:00

Asteazkeneko argazki hau jaso dut, Facebook-eko mezu baten bitartez, ezagutzen ez dudan pertsona batek bidalita.

Boiseko (Idaho) Oinkari Basque Dancers taldearen saioa aurkezten nabil.

Eskerrik asko argazkilari eta bidaltzaileari! =)

Culturilla general

2011-07-08T18:08:00.003+02:00

Arabako Foru Aldundian EBk izan du giltza:

EAJri bozkatu (jeltzaleek Aldundia gobernatu zezaten) edo euren hautagaiei bozkatu.

Bada, EAJ eta EBren arteko ika-mika bategatik, bigarren alderdi honek (barne-bilera batean) botoa bere hautagaitzari ematea ebatzi zuen, jakinda ere hori eginda PP izango litzatekeela Aldundian jaun eta jabe. Eta horrelaxe gertatu da: alderdi popularrak berreskuratu du Arabako Foru Aldundia. ALA BA!

Eskubide urratua

2011-07-05T16:31:00.008+02:00

BBK-n erreklamazio-orri bat jartzetik itzuli naiz gaur eguerdian etxera.

Galdakaotik mandatu batzuk egiten nabilela banketxera joan behar izan dut eta, orain gutxi arte bertako langile denak euskaldunak ziren herriko banku-entitateko egoitza nagusian, asteotan erdaldunak baino ez ditut aurkitu leihatilan. Bulegoko zuzendariarengana jo dut segidan (euskalduna da) eta argi helarazi diot neure kezka: gero eta euskaldunagoa den herri batean* ez dela onargarria euskaraz ez dakiten langileak jendaurrean jartzea. Atzeraka goaz ala?!

Neure kexaren xedea ez zen BBK-ren kontra egitea, euskararen alde egitea baizik.

Hori gutxi balitz, bitxia izan da egoera: hiru leihatiletan egon garen bezeroak euskaraz joan gara, baina langile gazteen erantzunen ondoren gaztelaniara jo dute neure ondoko bezero biek. Eta, noski, ez dute kexarik adierazi. Normala da. Euskaradunak eroso bihurtu gara. Euskaradunak lar adeitsuak gara.
Erakunde publikoetan ere, gaztelaniaz hitz egiteko eskatzen edo behartzen bagaituzte ere, geuk ez dugu inongo trabarik jartzen eta eurek nahitaez inposatutako hizkuntzan mintzatzen gara une oro.

Horregatik, noski, zalantza barik lehenengo hitza beti euskaraz egitea proposatzen dizuet eta, behar izanez gero, dagokion tokiko erreklamazio-orria bete dezazuen. Ez izan lotsarik. Erraza da. Ez dizue denbora askorik kenduko eta euskaraz bizitzeko lanean, aurrerapauso handia izan daiteke gutariko bakoitzak egin dezakeen euskararen aldeko defentsa oro.
Geuk zaintzen ez badugu, nork zainduko baitu euskara?

Geure eskubidea da eta geure hizkuntzak eskertuko du.

* Galdakoztarron %62 euskaldunak edo ia-euskaldunak gara (30.000 biztanleko herrian) , EUSTATen 2006ko datuen arabera.
Urtero kopuru horrek gora egiten du.

IBIL2D guztiak sarean ikusgai

2011-06-20T16:27:00.003+02:00

IBIL2D-ko azken saioa (eta gainontzeko guztiak), programako blogean eta eitb.com atarian ikusteaz aparte, estreinatu berri den 'EiTB Nahieran' zerbitzarian ere ikus daiteke oso-osorik eta aurreko web guneetan baino kalitate hobeagoarekin. Honaxe!

Errusiar xerra ala xerra bilbotarra?

2011-06-18T16:16:00.005+02:00

Iritsi gara etxera goiz-eguerdi bikain baten ondoren.

David de Jorge "Robin Food" sukaldariak, Karlos Ibarrondo goi-mailako chef-arekin batera, munduko errekorra gainditu du hanburgesako errusiar xerrarik eta handiena egiten. Primeran pasatu dugu elkarrekin eta plazer bat horrelako ekimen kurioso bezain solidarioa aurkezteko deitu izana. Eskerrik asko!

Hanburgesaren neurriak izugarriak izan dira: 15 metroko azalera, 400 kiloko pisua eta 2,5 zentimetroko lodiera.

Guztira, 4.000 anoa inguru atera dituzte. Anoak ogi puska banarekin saldu dituzte euro baten truke. Ateratako diru guztia Caritas Bizkaiarentzat izan da. Erakunde honen boluntarioek anoak prestatu eta banatu dituzte.

ekitaldiko argazki gehiago ikusteko, egin klik hemen.
eitb.com-eko berria ikusteko, egin klik hemen.
elcorreo.com-eko bideoa ikusteko, egin klik hemen.

Azken argazki bi hauek De Jorgeren lankideek ateratakoak dira, besteak beste, Davidek berak bidali dizkidanak.
Eskerrik asko artista!

Eskerrik asko eta laster arte!

2011-06-17T16:08:00.009+02:00

Larunbat honetan amaituko da ETB-1eko IBIL2D saioaren lehen denboraldia.

Azken programan Urkiolako inguruak hurbilduko dizkigu asteroko hitzorduak. Lau hilabete emisioan egin ondoren balorazio positiboa egin daiteke, audientzia emaitza onak jaso baititugu bai telebistan baita sarean ere. Horregatik, eskerrak eman nahi dizkizuegu jarraitu gaituzuen guzti-guztioi. Mila esker!

Elkar ikusiko dugulakoan, ondo izan eta laster arte!

...eta ASTERO legez, hementxe izango nauzue berba eta berba:

- GAUR ostirala, 17:15etatik aurrera ETB-2ko 'Ni mas ni menos' saioan.
- GAUR ostirala, 18:30etik aurrera ETB-1eko 'Arratsaldero' saioan.

- BIHAR larunbata, 07:45ean Radio Euskadiko 'Hagase la luz' saioan.
- BIHAR larunbata, 12:30ean Euskadi Irratiko 'Amarauna' saioan.

...eta BIHAR, 21:30etik aurrera... IBIL2D-ren azken saioa ETB-1en!

Betizu Jaia 2011

2011-06-12T00:25:00.005+02:00

Bihar, igandea, Betizuon urteroko hitzordu nagusia ospatuko dugu Bilboko Casilda Iturrizar Parkean: BETIZU JAIA 2011!!!

Gainera, jai-ekitaldi berezia aurkeztea egokitu zait aurten, Betizu Klubak 10 urte betetzen dituen honetan agur esango digulako betiko. Bere garaian Betizuk Superbat ordezkatu zuen bezalaxe, aurten HIRUk hartuko duelako Betizuk urte guzti hauetan geure etxeko txikien artean izan duen eginkizuna.

Aunitz urtez, ONGI ETORRI HIRU!!!

Egun osoko jaia bada ere, HIRUren aurkezpena eta ongi etorria zuzenean emitituko dute "streaming" bitartez EiTB.com-en arratsaldeko 18:00etatik aurrera. ETBko albistegi guztietan ere izango duzue jaiaren berri baina ekintza guztiez gozatzeko modu bakarra bertan egotea izango da... Zatoz etxeko txikiekin! =)

Gainera, ETBk Betizu Jaia 2011ren inguruan programa bat emititu zuen. 23 minututan laburbiltzen du bideoak Betizuren despedida eta Hiruren ongi etorria! (Hiruren ongi etorria neure aurkezpenarekin, 11. minututik aurrera hemen ikusgai)

Si Franco "viviria"...

2011-06-09T00:04:00.010+02:00

Astelehenean, hilak 6, berri hau argitaratu nuen neure Facebook-eko horman:

<<Euskal Herrian existitzen ez den (edo nahi ez duten) mapa Espainian badirudi existitzen dela. Hala eman zuten adieraztera TVEko tertulia politiko batean baina, zerekin lotzen dituzte beti ikurrinaren koloreak eta Euskal Herria bere osotasunean?>> Ikus berria

BADA, erreakzioak berehala iritsi dira eta TVEk barkamena eskatu du "Nafarroa eta Frantziako probintziak Euskadiko mapan txertatzeagatik". JA!

2011ko udal hauteskundeak Galdakaon

2011-05-23T15:33:00.017+02:00

Galdakaon izan ditugun hauteskundeen emaitzak ikusita, EAJ eta Bilduren arteko akordio bat proposatuko nuke. Alderdi batek ere ez duenez erabateko gehiengorik lortu, gehiengoa izango litzateke lehenengo (8 zinegotzi) eta bigarren (5 zinegotzi) alderdien arteko hitzarmena.

21 eserlekuk osatzen dute Galdakaoko Udala. Hortaz, 11 da gehiengo osoa. Proposatutako elkarketa politiko honekin 13 zinegotzi lortuko lituzke EAJ eta Bilduren arteko itunak. Interesa, lan egiteko nahia eta zintzotasuna besterik ez litzateke faltako. Animo!

Gonbidapena

2011-05-19T17:50:00.001+02:00

74 urte dira Galdakao bonbardatu zutenetik eta oroimen historikoa berreskuratu nahian, herriko hainbat eragile eta norbanakok bideo emanaldia, lekukoen testigantzak eta garai hartako galdakoztarrak omenduko dituen ekitaldia antolatu dute. GAUR, arratsaldeko 19:30ean Torrezabal Kultur Etxean. Sarrera doakoa da.

Aurkezle paregabea eta antolakuntza ezinhobearekin =), giro ederrean geure herrian ZER gertatu zen jakingo dugu eta, geure herritarrek nola bizi izan zuten ezagutuko dugu.

Ez zaitez ezjakintasunean gelditu eta... ANIMA ZAITEZ!!!

Elkarrizketa EHUn

2011-05-08T22:35:00.017+02:00

JON GOMEZ GARAI. Aurkezlea.

“ETBk nigan jarri duen konfiantza ikaragarri eskertzen dut”

EHUn Kazetaritza ikasketak alde batera utzi dituen arren gogotsu ari da lanean Jon Gomez Garai gazte galdakoztarra. Oso mutil kaletarra da Jon, jendaurrean aritzea asko gustatzen zaiona eta komunikatuz transmititzea zainetan daramana. EiTB ezaugarri horietaz jabetu zen eta bere lanaren fruitu, otsailetik ETB-1eko IBIL2D programako aurkezlea da.

Andrea Calvo Garcia Galdakao

Aste Santuko arratsalde batean elkarrekin geratu ginen. Jonek jator eta adeitsu hartu ninduen Galdakaon eta bere musika bai dantza taldeko txokora eraman ninduen, bertan elkarrizketa egiteko leku erosoago baten bila. Hasieran apur bat lotsati ibili zen, bere hitzetan elkarrizketatua izateko ohitura asko ez duelako, baina ardura guztiak berehala kendu zitzaizkion eta gustura aritu ginen solasean.

Nola ikusten duzu zeure burua?

Nire burua saltsero moduan deskribatuko nuke. Komunikazio alorrean, irratian, prentsan eta telebistan aritzeaz gain, plazarik plaza eta herriz herri ibiltzen den gaztea. Batetik bestera ibiliz, asko ikasten saiatzen naiz, denetan baitago zer ikasi. Hori ez al da ba, saltsero izatea?

Bereziki komunikazio munduan aritzen zara eta, jadanik, esperientzia hartu duzu. Nola hasi zinen eta zein izan da zeure orain arteko ibilbidea?

Ibilaldiarekin hasi nintzen, Galdakaon 2009.urtean ospatu zen edizioarekin batera. Siesta itzela egiten nabilela Ibilaldiko aurkezpen ofiziala egiteko deitu zidaten. Orduko denboran nik ez nuen nire burua horretarako kapaz ikusten baina, neure onerako, baiezkoa eman nuen. Aurkezpen ofiziala egin eta gero Ibilaldiko kultur eta musika batzordean laguntzaile aritu nintzen eta bertatik komunikazio arduradun izatea eskaini zidaten. Lagunak egiteaz gain, komunikabideen munduko kontaktu mordoxka eta esperientzia bikaina eskuratu nituen antolakuntzan. Horren ostean Hamaika Telebistan asteroko saio bat aurkezten ibili nintzen eta aldi berean Betizu Ikuskizunak aurkezteko opatu zidaten. Bertan bi urtez ibili ondoren ETBrekin zuzeneko harremana izan nuen Hondarribin egindako Euskal Herriko V. Pintxo Txapelketa aurkeztu nuenean. 2010-2011ko Gabonetan Olentzeroren Etorrera eta Erregeen Kabalgata aurkeztu nituen zuzenean Izaro Iraeta eta Klaudio Landarekin.

Gaur egun, ETB-1eko IBIL2D saioko aurkezlea naiz.
Aitortu beharra daukat pozik ari naizela lanean. Telebista mundua askok uste dutena baino gogorragoa bada ere, ETBk nigan jarri duen konfiantza ikaragarri eskertzen dut eta horrek (izaten ari garen emaitza onekin) lanean jarraitzeko indarrak ematen dizkit.

Zertan oinarritzen da IBIL2D?

IBIL2D saioa, hitzak dioen legez, Euskal Herriko ibilbideak proposatzen dituen saioa da. Larunbatero 21:30ean emititzen da ETB-1en eta saio bakoitzean erraz egiteko ibilbide desberdin bat proposatzen dugu. 10-12 kilometroko tarte horretan lau edo bost interes puntu erakusten ditugu eta, noski, puntu konkretu horiek ezin hobeto azalduko dizkiguten inguruko herritar edo pertsonaiak ezagutuko ditut. Azken hauen bitartez delako, hain zuzen, inguru bat gertutik ezagutzeko biderik onena.

Zein asmorekin sortu da IBIL2D saioa?

Euskal Herria hobeto ezagutzeko asmoarekin. Gehiago esango nuke, gainontzeko herrialdeak baztertu edo gaitzetsi gabe noski, eta neurri berean jarriz, baina: askotan harrotasunez esaten dugu atzerrira goazela oporretan eta sarri indarrak galtzen ditugu atzerria ezagutzen geure Herria ezagutu barik. Oinarri horretatik sortu zen IBIL2D.

Eta nola tratatzen zaituzte ETBn?

Ondo. Oso ondo. Egia esan oso gustura nabil. Gainera aurkezle gazteena naiz eta agian, askoren ustetan, ETBn sartu berri den ume kuttuna. Miramonera edo Bilboko egoitzara joan eta berotasun handia ematen didate, kritikak jasotzeaz gain (beharrezkoak dira), asko animatzen diogu elkarri eta horrek ilusioa pizten dizu. Oso harreman polita dago aurkezle eta gainontzeko langileen artean. Nola kexatuko naiz ba?

Orduz kanpo, erromerizale

Lana neketsua dela aitortu du ere, berak ez zuen imajinatuko astero ordu erdi bateko iraupena besterik ez duen saio batek hainbeste lan emango zuenik. Denbora asko behar dute grabazio guztiak egiteko; horri, aurretiko eta atzetik dagoen produkzio lan guztia gehitu behar zaio, noski. 15 langile inguru ari dira programa egiten: gidoilari, produktore, makillatzaile, editore, errealizadore, grafista, teknikari eta abarren artean.

Gainera, oporraldiagatik galdetzerakoan lasaitasuna hartzeko izugarrizko gogoa duela adierazi zuen, nahiz eta udaberria eta uda diren berarentzat lanaldi. Dantza taldearekin eta erromeria taldearekin aritzen da orduan.

Lehen Oxabi erromeria taldea aipatu duzu…

Trikitixa, dultzaina, alboka, xirulak, tronpeta, saxofoia, baxua eta bateriarekin denetariko musika egiten dugu. Geure burua erromeria taldetzat dugun heinean (edo erromerizaletzat), musika dantzagarria egiten dugu, beti ere euskaraz eta giro euskalduna sustatu gurean, nagusiki. Horixe izaten dugu geure helburu nagusia, giro jatorra eta jai-giroa sortzea. Horretan saiatzen gara behintzat! =) Eta horixe izaten dut neure aisialdiko jardun nagusia, ikuskizunaren mundutik irten gabe, baina beste saltsa batzuetan sartzea…

#Bildu

2011-05-02T15:39:00.004+02:00

Twitter-en pil-pilean dagoen gaia da Bilduren ilegalizatzea (ez da gutxiagorako), eta neuk esanguratsuenak iruditu zaizkidan tweet-ak bildu ditut Facebook plataformako ohar honetan. Milaka gehiago daude.